Im Rahme von de Sanierig vo de Melligerstrass z Bade isch au d Isebahnbrugg ersetzt worde. Sit hüt Nacht isch sie dete, wo sie anne ghört.

D Sanierig vo de Melligerstrass uf em Abschnitt Schademühli bis Iimündig Oberstadtstrass isch e komplexi Sach. Eis vo de grössere Teilprojäkt isch di noi SBB-Brugg gsi, wo de Bahnhof Wettige über Bade-Oberstadt mit em Bahnhof z Mellige verbind. Bis jetzt isch d Durchfahrtshöchi bi 3.90 Meter gsi, was immer wider dezue gfüehrt het, dass LKW stecke blibe sind. Das wot me aber durch en Absenkig vo de Fahrbahn und ned durch en Aahebig vo de Brugg ändere. Die noi Brugg het au e grösseri Spannwiti, wie die bisherig, so dass de Platz für Fuessgänger, Velofahrer und Automobiliste grösser wird und au de Langsamvercher gnueg Ruum übechunnd.

Wil d Strass mit 23’000 Fahrzüüg und 680 Büs pro Tag fescht usglaschted isch, het me si für d Ernoierig vo de Brugg ned eifach chönne die ganz Ziit sperre. Us dem Grund isch nebe de bestehende Strecki di noi Brugg betoniert worde und innere spektakuläre Aktion vom Fritig, 27. bis Sonntig, 29. Mai 2022 an di richtig Stell verschobe worde. So het d Strass numme an zwöi Wochenänd müesse gsperrt werde. Die erschti Sperrig für de Abriss vo de bestehende Brugg isch vom 22. bis 25. April 2022 gsi, die für de Iischub vo de noie Brugg goht no bis morn am Morge um 5i.

Bim Kanton gits au es Ziitraffervideo, wo di Bauarbeite zeiged, bis zu de Verschiebig vo de Brugg i de letschte Nacht: https://feed.yellow.camera/3AMPF4WWA