Vor de Pandemie isch d Spaghettata vo de reformierte Chile Wettige-Noiehof e guet bsuechti Veraastaltig gsi. Morn started de Aalass wider.
Vo Auguscht 2016 bis Februar 2020 het jewils am letschte Mittwoch vom Monet (abgseh vo de Schuelferie) im reformierte Chilegmeindhuus z Wettige a de Etzelstrass d Spaghettata stattgfund. Danach het d Pandemie de Aalass verhindered und mit de Pensionierig vom Co-Leiter Hansruedi Roth het au de Lutz Fischer-Lamprecht sini Co-Leitig abgeh. D Pandemie isch verbi oder macht wenigschtens e Pause, so dass es morn, 25. Mai 2022 wider los goht. Noi het jetzt d Sozialdiakonin Yvonne Keller s Heft i de Hand und het es Freiwilligeteam zämegstellt, wo bi de Spaghettata tisched, choched und abwäschd.
Wi bisher find d Spaghettata im reformierte Chilegmeindhuus z Wettige jewils am letschte Mittwoch vom Monet statt. Au d Aafangsziit um 12i blibt gliich. Noi ligd de Priis für Erwachseni (ab 16) bi 8 Franke inkl. Mineral, em Glas Wy und em Kafi und für Chind bi 5 Franke. En allfällige Überschuss wird ufs Spendekonto iizahlt, wo di reformiert Chile Wettige-Noiehof für d Ukraine iigricht het.