Im Industriegebiet z Spreitebach isch en Grossbrand usbroche. Siebe Persone hend e Rauchgasvergiftig becho.

Am Sunntig, 29. Mai öppe um Halbiföifi isch im Industriegebiet z Spreitebach en Brand usbroche. D Füürwehre vo Spreitebach-Killwange, Bade, Würelos, Wettige, Dietikon und d Werksfüürwehr vo de EMS Chemie z Dottike sind im Iisatz gsi. Au d Füürwehr Noiehof isch im Iisatz gsi, zumindest mit de Verchersgruppe. Siebe Persone hend e Rauchgasvergiftig becho un vier devo hend ins Spital müesse.
Betroffe gsi sind mehreri Gebäud und au Lastwäge, wo dete parkiert hend, sind usbrönnd. De wit sichtbari schwarz Rauch het d Löscharbeite erschwert und isch durch Bitume entstande, wo in ere Halle glagered isch gsi. De Schade cha d Polizei no ned beziffere.
Die meischte vo de öppe 100 Füürwehrlüt hend am Sunntigabe wider chönne de Brandplatz verlah, wils Füürwehr glöscht gsi isch. Wie üblich, isch aber e Brandwach do blibe, zum allfälligi Gluetnester chönne z bekämpfe.
Funkeflug hets bis über d Autobahn geh und es isch um 6i no ned klar gsi, ob d Autobahn muess gsperrt werde. Stau hets dete in Richtig Bärn einewäg geh.