Geschter, 22. Oktober 2020 isch d Bahnlinie vo de S6 zwüsche Wettige und Otelfinge unterbroche gsi. Grund isch en herrelose Koffer gsi.
D Kantonspolizei Aargau warnt devor, Gepäckstück ohni Ufsicht irgendwo stah z lah. Au si miteme Schloss irgendwo z fixiere wird ned zur Nachahmig empfohle. De Grund für de uf de erschti Blick ungwöhnlich Ufruef in de Soziale Medie isch en Vorfall geschter am Bahnhof z Würelos. Dete het en Maa, so schriibd d Kapo uf Facebook, en Kofer so lah stah, wi mes uf de Foti cha gseh. Er het de Koffer, wo en Kürbis als Inhalt gha het, ned uf em Velo chönne transportiere. De folgendi Polizei iisatz het de Bahnvercher lahmglegt. S Glück im Unglück isch gsi, das de Bsitzer zruck cho isch, bevor us em Polizeiufgebot en Grossiisatz worde isch.
D Kapo bittet us dem Grund no einisch dringend, Gepäckstück nie ohni Ufsicht stah z lah.