S noi Thermalbad z Bade wird unterm Name «Fortyseven°» firmiere. En Umfrog unter oiserne Läserinne und Läser zeiged, dass de Name kein grosse Aaklang find.
En noii Marke oder es Logo kreiere, dass isch immer e grossi Useforderig. Schnell gits e meh oder weniger grossi Gruppe vo Lüt, wo us de unterschiedlichste Gründ ned zfride sind. De Claim «Baden ist.» isch umnstritte gsi, wi au «Stern an der Limmat» für Wettige. Am meischte Widerstand het in de Region het wohl d «ALTSTADT» fürs noie Alterszentrum vo de St. Bernhard AG erfahre, wo – wenn si dann fertig isch – doch wider «St. Bernhard» heisse wird.
Obs «Fortyseven°» au eso wird goh, blibd abzwarte. Bi ere Umfrog unter oisne Läser hend sich 75 % gege de Name usgschproche und au bim Badener Tagblatt sind es 61 %, wo klar nei säge. D Usgangslag isch aber ganz en anderi. Während d Zielgruppe vom Alterszentrum ind e Region läbed und dodemit de Widerstand vo zuekünftige potentielle Bewohner cho isch, isch de gröschti Teil vo de Zielgruppe im Fall vom Thermalbad Bade ned vo do. Schuscht wäred di öppe 150 Millione Franke Investitionschoschte ned z refinanziere und eme internationale Publikum chönnd de Name ja no gfalle.