Ab em Mentig, 6. Juli 2020 wird d Brugg über d Limmig zwüsche Noiehof und Wettige saniert. Z erscht wird de Velowäg gschperrt, spöter de Vercher numme in einere Richtig über d Brugg gfüehrt.
S Verchersufkomme uf de Brugg zwüsche Wettige und Noiehof, wo im 1969 baud worde isch, isch höch. Us dem Grund wird si stark beaasprucht und muess saniert werde, schriibd de Kanton Aargau uf sinere Website. Inere erschte Phase wird am Mentig de Velovercher obe über d Brugg gleitet und de Velowäg, wo unter du Fahrbahn duregoht, saniert. U.a. wird de Fahrbahnbelag ernoiered und s Gländer uf 1.30 Meter erhöht.
Nach öppe drü Woche set dann d Phase 2 aafange, wo en Einbahnvercher uf de Brugg notwendig machd. De Vercher vo Wettige uf Noiehof laufd über d Brugg und wird numme aaghalte, wenn en Bus oder es Blauliechtfahrzüüg vo de Autobahn oder vo Noiehof her Richtig Wettige muess. Di ander Fahrzüüg, wo vo Noiehof uf Wettige wend, müend en Umwäg uf sich neh. Dodefür gits zwöi möglichi Routene. Me cha über d Autobahn zur Usfahrt Wettige-Ost oder über Bade und d Hochbrugg uf Wettige fahre.