D Swisscom het scho im Vorus aakünd gha, dass di letscht Telefonkabine am 28. November 2019 abmontierd wird. Es isch di im Badener Quartier Kappelerhof gsi.
Hüt, Donnschtig, isch di letscht Telefonkabine, d Swisscom het si zum Schluss Publifon gnennd, abbaud worde. Si het sit em 1962 a de Bruggerstross 164 z Bade gschtande. D Medie sind zum Ereignis iiglade gsi und s Badener Tagblatt het es Video veröffentlichd, wo me cha luege, wi d Kabine uf en Laschtwage glade wird.
D Telefonkabine wird im Museum für Kommunikation z Bärn ufgschtellt werde, in Erinnerig an e Ziit, wo hüt i de Schwiiz nach 140 Johr es Änd gfunde het. Wege de grosse Verbreitig vo Mobiltelefon sind d Publifon defizitär und letschtlich überflüssig worde.