Was am Tsischtig, 26. November 2019 z Spreitebach passierd isch, het Selteheitswert. De Gmeindrot het d Gmeindversammlig kurzfrischtig müesse absäge, wil so vil Lüt cho sind.
Z Spreitebach chömmed zuere Gmeindversammlig öppe 100 bis 180 Lüt. Wil mit em Baukredit für en Neubau vom Gmeindhuus und de Teiländerig Neumatt vo de Bau- und Nutzigsordnig gwichtigi Traktande hend selle verhandled werde, het de Gmeindrot mit dütlich meh Lüt grächned. Öppe di drüfache Aazhal Lüt het me gschätzt, also 540 und het für d Gmeindversammlig in d Boostockturnhalle iiglade, wo au für 600 Persone Platz gsi wär. Cho sind aber 700 Stimmberechtigti und 50 Gäscht. En greglede Ablauf vo de Versammlig isch so ned möglich gsi, so dass de Gmeindrot d Versammlig het müesse absage. Innerhalb vo de nächschte 10 Täg wot de Gmeindrot d Bevölkerig informiere, wann und wo di Gmeindversammlig wird stattfinde. Bis da anne set er en Ort gfunde ha, wo so vil Lüt Platz hend.