Vili Chind und Jugendlichi froied sich jewils uf Halloween, will si sich verchleide chönd und Süessigkeit überchömmed. Aber ned alli halted sich a d Spielregle.
Jedes Johr isch de Tag nach Halloween au eine, wo vili Huusbsitzer einisch um ihres Huus umelaufe und nach allfällige Schäde lueged. Nachdem mir Hiwiis us Gmeinde im Limmattwal übecho hend, dass es zu Sachbeschädigunge cho isch, hend mir vo de Stadtpolizei Bade und de Regionalpolizei Wettige-Limmattal, wo im Aargauer Teil vom Limmattal zueständig sind, welle wüsse, wi Halloween us ihre Sicht gloffe isch.
De Hermann Blaser, Kommandant Stellvertreter vo de Stadtpolizei Bade het bestätiged, dass es i de Nacht vom 31. Oktober uf de 1. November 2019 zu einzelne Sachbeschädigunge cho isch. An verschidnige Gebäud siged Eierwürf an d Fassade feschtgstellt worde und in eim Fall hets e muetwilligi Sachbeschädigung mit erheblichem Sachschade geh. Wil es sich aber um es laufends Verfahre handled und für d Ermittlige d Kantonspolizei zueständig isch, het er kei witeri Uskünft chönne geh.