Zum 25. Mol het d Generalversammlig (GV) vo de EVP Wettingen-Limmattal im Huus vo de Edith und em Martin Studer stattgfunde. D Partei, wo im 2019 s 100-jährig Jubiläum fiired, politisiird z Wettige sit em 1933.
D EVP ghört zu de chline, aber verlässliche Partei, wo sich sit 100 Johr für Mönsch und Umwält iisetzt. Sit em 2012 isch d Partei i de Region als Regionalpartei organisiird und nebe de Wettiger ghöred au d Mitglider us de Gmeinde Bärgdietike, Killwange, Noiehof, Schpreitebach und Würelos zu de EVP Wettige-Limmattal. De Präsident, de Lutz Fischer-Lamprecht, het bi de Versammlig au de EVP-Kandidat fürs Präsidium vom Bezirksgericht Bade, de Christian Bolleter chönne begrüesse. Der het vo sinere Arbet an verschidnige Aargauer Gricht brichted und au d Ufgabe vomene Grichtspräsident erlütered. D EVP Regionalpartei wünscht im vil Erfolg im 2. Wahlgang am 19. Mai 2019.
Bim Rückblick vom Präsident uf di vergangene Veraastaltige isch de Bsuech z Killwange en bsundere Läckerbisse gsi. D Teilnehmendi hend e historische Stätte ebeso chönne bsueche, wi e malendi Künschtleri in ihrem Atelier und d Firma Nordfisch. Au Informatione und Diskussion über d Ortsentwicklig mit em Killwanger Gmeindamme Werner Scherer het zum Programm ghörd. De zwöit Spaziirgang im 2019 het de Schwerpunkt «Kunst» gha und d Partei und vili Interessiirti uf d Chloschterhalbinsle gführt. Dete het de ehemolig Kantilehrer, Künschtler und exzellente Kenner vom Kulturwäg Limmat und de Gschicht vom Chloschter und de Chloschterhalbinsle, de Ruedi Sommerhalder, di Teilnehmende bi ere Führig entlang em rächte Flussufer vo de Holzbrugg zum Webermühlistäg an sim Wüsse la partizipiire. Über di noi Drüfachturnhalle und d Chraftwerkstross isch es dann in d Chloschtergärtnerei gange, wo d Partei en Apéro offeriird het.
D Marie Louise Reinert het en Überblick über di behandelte Gschäft im Iiwohnerrot geh, de Lukas Rechsteiner, de Christoph Fäs und de Lutz Fischer-Lamprecht hend Iiblick in ihri Tätigkeite in de Sozial-, de Iibürgerigs- und de Gschäftsprüefigskommission geh und d Grossrötin Lilian Studer het über d Thme brichted, wo de Grossi Rot beschäftiged. Bsunderi Aalige sind ihr dodebi Palliative Care, s Engagement gege de Mönschehandel und d Arbet i de Justizkommission.
Im Ausblick ufs laufendi Johr freud sich d Partei uf de Spaziirgang «Kunst im Dorf – Kunst im Quartier», wo am 11. Mai um Zwöi am Namittag bim EW-Gebäud a de Landstross started (Anm. vo de Red.: Vorbricht chund no). Au d Nationalrotswahle und d Vorarbeite dadefür werded d Regionalpartei in de nächschte Woche und Mönet beschäftige.

Mit ere Verdankig vo de Gaschtgeber het de Präsident d Sitzig gschlosse und zum aaschlüssende gmüetliche Zämmesii iiglade.



Advertisements