Furttal/Limmattal – Für Samschtig, 6. April 2019 het d Gmeind Hüttike es Hochzitsschüsse gnehmiged gha. Bis wit ins Limmattal het me s chönne höre.

S hend ned alli Froid gha, wo s am Samschtigmorge ab em Sächsi im Furt- und im Limmattal immer wider chlöpfd het. Hünd hend zum Teil reagiird und d Wettiger Nochrichte hend Aafroge übecho, was los sig. Dass vili ned gwüsst hend, warum es so früeh am Morge chlöpfd und woher de Lärme chunnd, het ned grad zur Beruhigung bitraid.

Gärn kläred mir uf, was gsi isch. Wi d Gmeind Hüttike uf ihre Homepage mitteild, het de Polizeivorstand mitere Verfüegig vom 1. April di alti Tradition vom Hochzitsschüsse für de 6. April gnehmiged gha. De alti Schwiizer Bruuch wird nüm eso hüfig pflägd, dass s Chlöpfe ned als Hochziitsschüse erkannd wird oder Lärm sogar zu Chlage führd.