Aargauer Limmattal – Di viir lokale Rotaryclubs Bade, Bade-Rohrdorferbärg, Wettige und Wettige-Heitersbärg hend im Rahme vomene Gmeindienstprojäkt am Limmatuferwäg bim Zollhuus Wettige e Füürstell baued. D Füürstell isch es Teilprojäkt vo vilne plante Massnahme zu de Ufwertig vom Naherholigsgebiet Limmatruum i de Region Bade-Wettige.
Zum erschte Mol, so schriibed d Rotaryclubs in ihre Mediemitteilig, hend si zämme es so grosses Projäkt realisiird. Nebe de Ufwertig und de Nutzbarmachig vom Ruum am Ufer vom Fluss, sell de Bevölkerig s schöni Gebiet a de Limmig nöcher brochd werde. Di viir Rotaryclubs wend öfter emol settigi Projäkt in de Region gmeinsam umsetze.
De Grillplatz a de Limmig isch am 30. März 2019 mitere chliine Fiir iigweiht worde. D Planige hend scho im 2012 aagfange gha. Alleige de Wäg durch alli Instanze, wo s Projäkt hend müesse bewillige, het di 4 Clubs 20’000 Franke choscht. Di viir Clubs danked au usdrücklich de involviirte Gmeinde, bsunders de Gmeind Wettige, em Kanton Aargau, wo det ede Grundeigetümer isch und de EWZ, wo s Projäkt überhaupt erscht ermögliched hend.

Advertisements