Bi de zwöite Box Gala im Trafo z Bade isch de Stefan Rumpold ned zum erhoffte Erfolg cho. In sim 9 Profikampf het er sini erschti Niderlag müesse iistecke.

D Erwartige sind hoch gsi, an d Box Gala als solchi und au an de Stefan Rumpold. De Lokalmatador us Chlingnau het de Hauptkampf bestritte bi dere zwöite Box Gala. Nachdem die erschti Uflag im November 2021 no dur d Pandemie mit Iischränkige het müesse läbe, het diesmal unghemt chönne gfiired werde.
So isch in de usverchaufte Trafohalle d Stimmig super gsi. Bim Showprogramm hend en Tänzer, Tänzerinne, en Gigespieler und d DJ Tanja La Croix em Publikum iigheizt.
Im Mittelpunkt sind aber natürli d Boxkämpf gstande. Aagfange het es mit em Duell zwüschem Rico Giger us Frauefäld und em Ungar Laszlo Sarandini. Nach 56 Sekunde isch scho alles vorbi gsi und de Laszlo Saradini isch nach eme Leberhake uf de Bretter gläge. es isch es zitli gange, bis er wider het chönne ufstah. De zwöit Kampf isch der zwüschem Hamburger Dominik Ameri em Franzos Noureddine al-Goumi gsi, de technisch beschti Kampf und eine vo de beide, wo ned vorzitig gänded het. Nach Punkte het de Dominik Ameri Nase vore gha. De Dameboxkampf mit de Michaela Kotásková het ned chönne stattfinde, so dass de Seun Salami us Öschtriich scho bim dritte Duell im Ring gstande isch. Wil de ursprünglich pland Gegner usgfalle isch, het er de Jan Torok us Tschechie als Gegner gha. Dem het me au optisch aagseh het, dass er no ned würkli parat für de Fight isch. Nach em erschte Niderschlag het sin Trainer s Handtuech in de Ring grührt, so dass au der Kampf schnell vorbi gsi isch. Im vorletschte Kampf sind sich dann de Mobin Khahrazeh, en Iraner us Wien und de Tschech Jiří Kroupa gegenüber gstande. Anderscht wie sin Landsmaa, het er em Khahrazeh chönne standhalte, so dass der Kampf über 6 Runde à 3 Minute gange isch. Verlore het er aber gliichwohl.
Sehnlichscht erwartet vom Publikum, isch es dann zum Hauptkampf zwüschem Stefan Rumpold und em Dütsch-Kroat Robert Grgurić gsi. 10 Rnde à 3 Minute sind vorgseh gsi, so wit isch es aber au bi dem Boxkampf ned cho. Vo Aafang aa het me em Stefan Rumpold e grossi Nervosität aagmerkt und hüfig het er sini Deckig vernachlässiged. Nur so het de Robert Grgurić, wo eidütig de schlechter Boxer vo dene beide isch, chönne mithalte und zum Schluss triumphiere. Einige Schläg het er a de Chopf vom Rumpold brochd, wobi me in de 4. Runde de Iidruck gha het, bim Stefan Rumpold sig de Chnopf platzed und er chönnd den Kampf durch K.O. gwünne. Beidi Schwergwichtsboxer hend gwanked und es het chönne so oder so usgah. In de föifte Runde het dann aber de Stefan Rumpold müesse ufgeh, schwer gezeichned au vomene Leberhake, wo er scho in de erschti Runde het müesse iistecke. So isch de Robert Grgurić mit em Titel «WBF International» us em Ring.
D Afterparty isch dann s letschti Heighlight vo dere denkwürdige Box Gala gsi, wo numme danke em Werner Eglin, em Martin Thalmann und em Reto Schaffner zum zwöite Mol het chönne stattfinde und Bade so zuere Box-Stadt gmachd het.