In de Nacht uf Samstig, 21. Januar 2023 isch bi de Usfahrt Bade-West vo de A1 es Auto von de Fahrbahn abcho und het sich überschlage. En Maa, wo in kritischem Zuestand ins Spital brochd worde isch, isch in de Zwüscheziit verstorbe.

Es isch am Morge öppe um Halbizwöi gsi, wo sechs Persone ineme Mercede-Van uf de A1 in Richtig Züri sind unterwegs gsi. Di 19-jährig Automobilistin, wo z Fahrzüüg glenkt het, isch uf Höchi vo de Usfahrt Bade-West rechts vo de Fahrbahn abcho und het im Gländ zwüsche Fahrbahn und Usfahrt d Betonelement grammt, wo dete stönd. De Van het sich dann überschlage und isch uf em Dach lige blibe.  D Polizei und de Rettigsdienst hend im Fahrzüüg en iichlämmte Maa vorgfunde, wo ned aasprechbar gsi isch. Alli andere, drü Fraue und zwöi Manner im Alter vo 16, 19, 43, 52 und 53 Jahr, sind nunme liecht verletzt gsi, hend aber gliichwohl ins Spital müesse.

De schwerverletzti 18-jährig Sangaller isch vo de Füürwehr befreit und vo de Ambulanz wiederbelebt worde. Aaschlüssend isch si in kritischem Zuestand ins Spital brochd worde, wo er in de Zwüscheziit verstorbe isch, wie d Kapo an Sunntig am Morge mitteild het.

D Ursach vom Unfall isch no ned klärt. D Kapo ermittled und d Staatsaawaltschaft het e Bluet- und Urinprobe aagordnet..

Advertisement