Bi de Chilegmeindversammlig vo de Reformierte Chile Wettige-Neuehof isch de Tim Schnoor neu in d Chilepfläg gwählt worde. Vom Überschuss vo de Jahresrechnig 2021 gönd 20’000.- Franke an de Verein «Bär und Leu», zum d Mönsche in de Ukraine z unterstütze.

Nach de musikalische Iileitig vo de Versammlig dur de Stefan Müller am Flügel, het d Präsidenti vo de Chilepfläg, d Margrit Wahrstätter, in de gwohnte souveräne Art und Wis dur d Traktande gfüehrt. D Rächnig 2021, wo miteme Überschuss vo 450’000.- Franke unerwartet guet het abgschlosse gha, het de Pfarrer Lutz Fischer-Lamprecht präsentiert, wil de Peter Müri ned het chönne cho. S gueti Rächnigsergäbnis het e Reihe vo Gründ gha: De Stüürertrag z Wettige isch usserordentli höch gsi, d Pfarrstell vo de Kornelia Dängeli isch nüm bsetzt worde, wege de Pandemie sind vili Veraastaltige usgfalle und d Seelorg am Regionale Pflägezentrum het über Reserve vom Seelsorgeverein chönne finanziert werde. Em Aatrag vo de Chilepfläg, de Überschuss em Eigekapital und de Rückstellige für Baute und Infrastruktur zuzwise und 20’000.- Franke über de Unterstützigsfonds an de Verein «Bär und Leu» zu überwise, hend alli 49 aawesende Stimmberechtigte zuegstimmt. De Verein «Bär und Leu» isch sit em 1999 in de Ukraine aktiv und het dete scho vieli Projäkte erfolgrich chönne begleite. Di Kontäkt nutzt de Verein jetzt, zum de Mönsche, wo vom Chrieg schwer troffe sind, z hälfe.

Wegem Wegzug vom Nico Wegmüller isch en Ersatzwahl für d Chilepfläg notwendig gsi Für s Amt het sich de Tim Schnoor zur Verfüegig gstellt und isch einstimmig gwählt worde. Witeri Theme sind d Unterstützig vom Kanton bi de Unterbringig vo ukrainische Flüchtling gsi, de Projektwettbewerb fürs neue Chilegmeindhuus z Wettige und de Bricht vo de letschte Sitzig vo de Synode.

Nach em Änd vom offizielle Teil vo de Sitzig isch denn en rege Ustusch bim Apéro pflägd worde.