Im 2022 wird de Planigsverband «Baden Regio» 75-jährig. Damit d Bevölkerig cha mittfiire, het «Baden Regio» föif Jubiläumswanderige kreiert, wo dur alli 24 Mitgliedsgmeinde füehred.
Es isch am 25. April 1947 gsi, wo de Planer, Ingenieur und Visionär Josef Killer de Verein «Regionalplanungsgruppe Baden und Umgebung» gründ het. De Planigsverband isch muetmasslich de erschti Planigsverband i de Schwiiz gsi und het bi de Gründig au Firmene und Privati als Mitglieder gha. Spöter isch er dann in en reine Gmeindeverband umgwandlet worde und hüt ghöred 24 Gmeinde us de Region Bade zu «Baden Regio».
D Mitgliedsgmeinde hend sich zum Jubiläum öppis bsunders usdenkd. Sie hend insgsamt 121 Standört vo bsunderem Interesse definiert, Hotspots, wo d Vielfalt vo de Region selled zeige. Mit föif Jubiläumsroutene cha me di Gmeinde erwandere und überall dann au no es «Usflüg» zu dene Hotspots mache. Im Limmattal ghöred zum Bispil d Umwältarena z Spreitebach, s Chloschter Wettige, de Kurpark z Bade und de Markthof z Nussbaume dezue, aber au s Ortsmuseum z Untersiggethal und s Schloss Stei z Bade. Die föif Route vom Jubiläumswanderweg werded am 21. Mai 2022 mit ere Fiir de Bevölkerig übergeh. Bi dem Aalass isch au de Landamme vom Kanton Aargau, de Alex Hürzeler debi. Im Oktober gits dann en Abschiedsevent.
Au en Wettbewerb gits zum Jubiläum, bi dem me e Ballonfahrt über d Region Bade cha gwünne.

Alli Infos zum Jubiläum cha me au uf de noi gstaltete Website vo «Baden Regio» abrüefe.