Im ganze Limmattal sind «Autoposer» es Ärgernis, wil si absichtlich Lärm verursached. Ob d Polizei gnueg gege de unnötig Lärm unternimmt,gsehnd ned alli gliich.
E Motion im Iiwohnerrot Wettige, wo d Fraktion CVP (hüt Die Mitte) im Sommer 2019 iigreicht het, zeiged, dass de Lärm dur d «Autoposer» ned erscht während de Pandemie zum Problem worde isch. Au für Autofans isch de Lärm es Problem, wil in de Bevölkerig so d Toleranz gegenüber Autoliebhaber sinkt.
En Vorfall vor zwöi Woche uf em Platz vom Schuelhuus Unterbode z Nussbaume, wo in zwöi ufenanderfolgende Nächt «Autoposer» im Chreis sind gfahre und so fescht überstüüred hend, dass d Pneuabdrück au no nach zwöi und hefitge Regefäll uf em Platz z gseh sind. Mir hend vo de Stadtpolizei Bade (Stapo), wo für Nussbaume zueständig isch und vom Gmeindrot Obersiggethal welle wüsse, was si gege s Phänomen vo de «Autoposer» düend unterneh.
De Martin Brönnimann vo de Stapo betont, dass si fürs ganze Gebiet vo de Zueständigkeit Meldige vo Autoposer übechömmed, mit Schwerpünkt in de Berich Station Siggethal, Würelinge und Obersiggetal. Binere Meldig über d Notruefzentrale vom Kanton würded d Meldige überprüeft und bi de Feststellig vomene Fehlverhalte di notwendige Massnhame ergriffe, also Buesse verteilt oder d Fahrzügführer oder -halter verzeiged. Au zilgrichteti Kontrolle in unregelmässige Abständ würded duregfüehrt. D Ressource für di verkehrspolizeiliche Beland siged usreichend, so de Brönnimann.
Em Gmeindrot vo Obersiggetal siged d Problem vo de «Autoposer» uf em Schuelgländ und de umliegende Strosse bekannt, schribd d Frau Gmeindamme Bettina Lutz zu oisere Aafrog. D Stapo und en Sicherheitsdienscht siged aagwise worde, dete vermehrt z partrouilliere. Bis jetzt hetti me aber no niemed verwütscht und au nach Meldige vo Aawohnende sig d Polizei jewils z spot uf em Platz gsi. E Sperrig vom Schuelhuusplatz sig au scho e Diskussion im Gmeindrot gsi, wil aber de Platz, grad am Wochenend au als Parkplatz für Veraastaltige bruuchd werdi, het me de Schritt bisher ned welle gah.