De aargauisch Regierigsrot het en Kredit über 5.7 Millione Franke bschlosse, damit d Hochbrugg cha instandgsetzt werde. Di ganz Brugg wird iigrüstet.

D Hochbrugg z Bade isch vo 1924 bis 1926 baud worde. Für de Vercher i de Region isch si wichtig und wird jetzt instandgsetzt, damit si ihri Ufgab au i de nächschte 25 bis 30 Johr cha erfülle. Im Fokus vo de Saniirig stoht d Instandsetzig vom Beton bi de Böge und de Untersite vo de Böge. Us dem Grund bruchds es Grüst, damit me an di Stelle anne chunnd. Zum dodefür de Platz ha, het sich de Kanton mit de Stadt Bade abgsproche.

Betroffe vo de Instandsetzig sind au d Trottoir und d Personeunterfüehrig und d Spurrinne am Bruggechopf Ost werded saniert.

Wenn d Limmattalbahn würkli emol set über d Hochbrugg fahre, brüchds witeri baulichi Massnahme, schribt de Kanton. Di siged aber unabhängig vo de jetzige Saniirig und es gäb au kei Synergieeffekt.

D Kreditsumme, wo de Regierigsrot gsproche het, liit bi 5’740’000 Franken und goht zu Laschte vo de Spezialfinanzierig Strosserechnig. Nach de Submission und de Vergab vo de Arbeite, sell no im März mit de Büez aagfange werde.