D Gmeind Obersiggethal het bi de Abstimmig über de Kredit fürs Schuelhuus Goldiland en Fähler gmachd. D Abstimmig cha gliichwohl am 29. November 2020 stattfinde, aber es git en Zuesatzufwand.
D Abstimmigsheftli und de Stimmzettel für de Kreditaatrag fürs Schuelhuus Goldiland hend en Fähler. Statt 10’404’000.- Franke gohts eigentli um en Verpflichtigskredit vo 11’404’000.- Franke. D Unterlage sind aber scho verschickt gsi, wo d Gmeind de Fähler bemerkt het und di erschte Lüt hend au scho d Unterlage usgfüllt.
In Abschproch mit em Gmeindamt vom Kanton übechömmed alli Stimmberechtigte in de nächschte Täg en Brief mit de Infos zum Vorgoh und en noie Stimmezettel. Heikel, so schriibd d Gmeind im Brief, sig es numme für di, wo scho abgschtimmt hend und wo zum Kredit über 10’404’000.- Franke würded ja säge, aber nei zu eim vo 11’404’000.- Franke. Di chönnd sich, wi au alli andere wo scho abgstimmt hend, bi de Gmeindverwaltig mälde und en noie Stimmrächtsuswiis verlange. D Unterlage, wo scho abgeh worde sind, werded dann mit Hilf vo de Stimmrechtsuswiis ussortiert und unter Wahrig vom Stimmgheimnis vernichtet. Wer scho mit Ja oder Nei gstumme het und wot bim Entscheid bliibe, muess aber nüd unterneh. D Stimme werded gliichwohl gwertet.
Alli, wo d Abstimmigsunterlage no ned usgfüllt hend, setted de alt Stimmzettel übers Schuelhuus Goldiland mit em noie ersetze, we er dann per Post chund. Zu beachte isch, dass s Iiläge vo beide Goldiland-Stimmzettel zunere ungültige Stimmabgab führt.
De Gmeindrot entschuldiget sich bi de Bevölkerig für den Lapsus!