Scho im September het s Badener Tagblatt drüber brichted, dass im öffentliche Ruum z Bade öppe 300 Kameras im Iisatz sind, wo d Sicherheit selled erhöhe. Mir hend welle wüsse, wo «Ännetwettige» im Vergliich zu andere Städt stoht und genauer anne gluegd.
We me d Aazahl vo de 300 Kameras z Bade durch d Aazahl vo de Iiwohner teild, chunnd me uf öppe 16.6 Kameras pro 1000 Iiwohner. D Stadt wär dodemit eine vo de Spitzeriter in Europa. Das zeiged sich, we me di Zahl mit ere Statistik vo statista.com vergliichd, wo für verschidnigi Hauptstädt z Europa d Aazahl Überwachigskameras je 1000 Iiwohner berechned het. D Stadt Bade wär dann uf em 2. Platz, dütlich hinter London (68.4), aber no vor Berlin, wo es 11.2 Überwachigskameras pro 1000 Iiwohner het.
De Martin Brönnimann, Leiter Öffentliche Sicherheit vo de Stadt, relativiert di höchi Zahl. 125 vo dene Kameras sind nämli in verschidnige Parkhüüser und im Stadion Esp installierd und er vermueted, dass di in di obe gnennte Statistik vo de europäische Hauptstädt ned iigflosse sind.
Bade bliibd aber au ganz vorne debi, we me numme di 172 Kameras rächned, wo uf em Stei, de Cordulapassage, em Metroshop und an vilne andere Ört i de Stadt montierd sind. Mit e chli meh wi 9.5 Kameras pro 1000 Iiwohner rütscht Bade uf de Platz hinter Berlin, aber stoht no vor em drittplatzierte Warschau, wo es 7.9 Kameras pro 1000 Iiwohner het.

Wer genau wot wüsse, wo z Ännetwettige Kameras installiert sind und zu wellem Zweck, der cha sich uf de Website vo de Stadt Bade informiere.