Wi s Badener Tagblatt melded, muess numme zwöi Johr nach de Eröffnig vom Schuelhuusplatz e Belagssanierig vorgnoh werde. D Busspur het de Belschtige ned standghalte.
Es tönt wi en schlächte Witz. Numme zwöi Johr nach de Eröffnig vom Schuelhuusplatz müend di erschte Schäd behobe werde. De Grund isch e Fehliischätzig bi de Busspur, wo vo de Melligerstross Richtig Bruggerstross führt und au als Abbiegespur Richtig Noiehof dient. De Asphalt het sich dete verformt. D Asphalttemperatur stiigt im Sommer teilwiis uf über 60° C und dezue stönd d Büs länger am liechtsignal, wi me ursprünglich gmeind het.
Wil d Büs Unterflurmotore hend, wo zuesätzlichi Wärme uf de Asphalt abstrahled und so vili Fahrzüüg d Spur nutzed, het sich de Belag verformt.
Vom Mentig, 28. September, bis Mittwoch, 30. September 2020 wird en Belag us Gussasphalt iibaud, wo schuscht uf Briggene verwendet wird und widerstandsfähiger isch.
Während de Sanierig wird d Abbiegespur Richtig Noiehof gesperrt und de Vercher wird über d Hochbrugg umgleitet, was zämme mit de zuesätzliche Fahrzpüüg uf de Hochbrugg wege de Sperrig vo de Limmatbrugg zwüsche Noiehof und Wettige zu zuesätzlichem Stau dörfd führe.
Wil es für d Bauarbeite trochnigs und warms Wetter bruuchd, cha si, dass sich d Ziit verschiebed.