Di verschidnige Jugendorganisatione vom Siggethal hend au im 2020 a de Aktion 72 Stund teilgnoh. S Thema sind d Insekte gsi, wo für ois Mönsche wichtiger sind wi mir oft denke.

Vo Donnschtig, 16. Januar bis Sonntig, 19. Januar 2020 hend Schülerinne und Schüeler us Ober- und Untersiggthal sich engagierd, um en Bitrag für de Schutz vo Insekte z leischte. Im Rahme vo de Aktion
72 Stund
hend si 120 Bienehotel baued, 4000 Säckli mit Same vo Wildblueme
gfüllt und verteild und d Bevölkerig über
d Wichtigkeit vo Insekte informierd. Au zu de Aktion het de Verchauf vo de Bienehotel ghörd und es grosses Fäscht mit eme Wettbewerb. Me het Froge zu de Bienli müesse beantworte, zu dene d Chind und d Jugendliche vorher di notwendige Informatione uf Plakat parat gschtellt hend.

D Uslosig isch no es speziells Ereignis gsi, wil z erscht alli Lösige, wo d Glücksfee zoge het, falsch si gsi und wo di erscht richtig Lösig zoge worde isch, het d Adresse ned druf gschtande. Es het dann no einisch e ganzi Reihe Zihige bruuchd, bis d Sigeri feschtgschtande het. Wil de Erlös vom Verchauf vo de Bienehotel Pro Natura Aargau het selle z guet cho, isch de Präsident, de Matthias Betsche da gsi und het sich über 5130.- Franke chönne froie.