D EVP Wettingen-Limmattal het en Info- und Diskussionsveraastaltig organisierd, wo d Kantonsgränze überwunde het. Referente und Bsuecher sind vo Züri und us em Aargau cho.

Bi de National- und Ständerotswahle sind d Kantön d Wahlkreis. Gliichwohl het d EVP e gmeinsami Veraastaltig fürs ganze Limmattal gmachd, wobi d Thematik wit drüber use gange isch. «Die Welt ist EINE» isch s Thema gsi und het Grechtigkeit und Nochhaltigkeit ins Zäntrum gschtellt, wo sit 100 Johr tragendi Wert vo de evangelische Volkspartei vo de Schwiiz und ihre Politik sind. D Lilian Studer, im Aargau Spitzenkandidatin für de Nationalrot, het gfordered, im Name vo de Grechtigkeit en globale Aasatz für di aastehend Klimapolitik z finde. D Partei, wo sich sit 70 Johr explizit für Umwält und Ökologie, Luft, Wasser, Bode und Biodiversität starch machd, wot au de nächschte Generation e lebensärti Umwält hinterlah. D Lilian Studer het dann skizzierd, wi de aktuell Stand vo de politische Schritt i de Folg vom Pariser Klima-Abkommen isch. Am 23. September wird de Ständerot übers CO2-Gesetz entscheide, do wird sich zeige, wo di grosse Parteie stönd.
De Winterthurer Nationalrat Nik Gugger, Spitzenkandidat vo de EVP Züri, het über d Gletscher-Initiative und d Trinkwasser-Initiative gred. Engagierd het es sich für di beide Initiative usgschproche: kei fossili Brönnstoff meh ab 2050. Treibhuusgasemissione ab em 2050 kompensiere mit Senke im Inland; e sozialverträglichi und volkswirtschaftsstärkendi Klimapolitik. Und: kei Direktzahlige meh für Betrieb, wo Antibiotika und Pestizid bruuche.
De Lutz Fischer-Lamprecht, Kandidat für de Nationalrot im Aargau, het am Bispil vo de e-Mobilität und vo Windparkaalage alternativi Energielieferante und noii Technologie zeiged, dass immer wider sorgfältig und ergebnisoffe prüefd muess werde, wi umwältverträglich d Herstellig, de Betriib und de Abbau vo innovative Technologie isch. D Helen Suter, ebefalls uf de Hauptlischte vo de EVP für de Nationalrot, het über d Macht vo de Konsumente gred und mit Zahle und Fakte über Littering und di grosse Mengene a entsorgte Läbensmittel informiird. De meischt Abfall entstohd wegem unsorgfältige Iichaufe.
Einig isch me sich gsi, dass d Entwicklig vom Ressourceverbruch entkopplet werde muess und d Ziit vo de gründliche Apell vorbi isch. Es bruuchd konkreti Massnahme. Für d Bewertig vo noie Technologie isch aber au vil Wüsse notwendig.

Advertisements