Us Protest gege d EU-Urheberrechtsreform isch di dütschsprochige Wikipedia am Donnschtig, 21. März 2019 für 24 Stunden abgschalte. Aber es git en Alternative!
Vilicht fröged sich jetzt oisi Läserinne und Läser, warum mir über d Abschaltig vo de Wikipedia schribe, isch das doch keis Limmattal-spezifischs Thema. Im Prinzip gits für den kurze Artikel drü Gründ:
– Au mir lehned s Leischtigsschutzrächt i dere Form ab, wo ned numme i de EU, sondern au i de Schwiiz sell iigführt werde.
– Bi de 30 Millione Ufrüef, wo di dütschsprochig Wikipedia jede Tag het, sind au vili Lüt us em Limmattal derbi. Ganz sicher und ganz sicher jede Tag!
– Aber s wichtigschte isch das: Ned numme mir schriibed uf Schwiizerdütsch. Di gröscht Site uf Schwiizerdütsch, sowohl vom Siteumfang wi vo de Klicks her, isch di alemannisch Wikipdedia. Am 21. März 2019 isch si e möglichi Alternative, we me en gsuechte Inhalt uf de dütschschprochige Wikipedia ned cha ufrüefe. Für Sprochenthusiaschte natürli au spöter no. Lueged doch eifach emol do inne.

Advertisements