Wer sich d Gschicht vom Limmattal kennt, weiss, dass Dietike und Hüttike einisch zu de Grafschaft Bade gehört hend. Jetzt sell e witeri Gmeind in de Kanton Züri wächsle.

Würelos isch in de letschte Johr gwachse, so fescht, dass es manche Iiheimische z viel worde isch und de Verein «lebenswerts Würelos» gründ worde isch. De Zuzug vo Lüt, bsunders us em Kanton Züri het aber no anderi Folge.

D Schuelferie, de Termin für d Fasnacht und mengs meh passt ned so rächt mit de Bedürfnis vo de vile Noiwüreloser zämme. Scho vor Monate hend mir di erschte Grücht vernoh, dass d Kantön Aargau und Züri über en Kantonswächsel vo Würelos verhandled.

Jetzt het such zeiged, dass d Verhandlige scho witgehend abgschlosse sind. Letschti Woche isch e hochrangigi Delegation vom Kanton Züri z Aarau gsi. Bschlosse worde isch, dass am 20. Oktober 2024, glichzitig mit de Grossratswahle, d Volksabstimmig z Würelos wird stattfinde, de Kantonswächsel sell dann auf de 1. April 2025 vollzoge werde.