Sit em Iizug vom Adrian Gräub in de Grossi Rat het Bade meh Grossröt wie Wettige. Das ändered jetzt mit sim Rücktritt.

Nach de Grossratswahle vom 18. Oktober 2020 hend Wettige und Bade glich viel Grossröt gha. Seither isch es zu einige Änderige cho. D Leandra Knecht isch vo Bade uf Turgi zügled, de Adrian Gräub (SVP Bade) und de Markus Schneider (D Mitti Bade) sind nachegrütsch und Michaela Huser (SVP Wettige) isch zruckträte. Bade het so plötzlich 8 Grossröt gha, Wettige numme 6. Das wird sich demnächst ändere.

De Adrian Gräub het bi de hütige Grossratssitzig vom 6. Dezember 2022 sin Rücktritt uf Ändi Johr bekannt geh. Wie d Fraktionspräsidenti vo de SVP im Grosse Rat, d Désirée Stutz bekannt geh het, wird de Marcel Gerny vo Wettige de Adrian Gräub ersetze. Dodemit stigd d Aazahl Grossröt us Wettige wider uf siebe und die vo Bade sinkt vo acht uf siebe. D Aazahl unter de 30 Grossröt vom Bezirk Ännetwettige isch in de beide Nachbargmeinde dodemit wider di gliich, wie am Aafang vo de Legislatur.