Scho Mitti September isch ineme Hotel im Bezirk Bade de Liichnam vomene 60-jährige gfunde worde. Er isch eme Gwaltverbräche zum Opfer gfalle und zwöi Tatverdächtigi sind in U-Haft.
In de Mediemitteilig, wo d Staatsanwaltschaft am 28. Oktober 2022 veröffentlicht het, schribd d Staatsanwaltschaft, dass si erscht jetzt d Öffentlichkeit het chönne informiere, wil si d Bewiisfüehrig ned hed well gfährde. Aber was isch eigentli passiert?
Scho am 16. September 2022 isch d Kantonspolizei über d Fund vonere Liiche ineme Hotelzimmer in ere Gmeind im Bezirk Bade informiert worde. D Polizei het dann en starch verweste Körper vorgfunde. Wil de Gascht sich längerfristig im Hotel iigmeitet und uf de Reinigungsservice verzichtet het, isch es so lang gange, bis er gfnde worde isch. Zum de Toti z identifiziere und d Todesursach usezfinde, isch de Liichnam ins Institut für Rechtsmedizin z Aarau brochd worde. Dete het me usegfunde, dass de Verstorbeni eme Gwaltverbräche zum Opfer gfalle isch.
Bi de intensive Ermittlige sind schnell zwöi Persone us em Bekanntchreis vom Opfer im Mittelpunkt vo de Ermittlige gstande, en 24-jährige Rumän und en 23-jährige us Dütschland. Für beidi het d Staatsanwaltschaft nach erschte Befrogige Untersuechigshaft beaatraid, wo vom Zwangsmassnahmegricht bewilloged worde isch. D Untersuechige zum genaue Tathergang laufed no und d Staatsaawaltschaft wiist druf anne, dass bis zunere allfällige Verurteilig d Unschuldsvermuetig dued gelte.