Ab em Sunntig, 21. November 2021 isch s Fortyseven offe zum goh bade. Vorher isch no de Tag vo de offnige Türe.
Bade isch sit de Römerziit en Ort mit ere Bädertradition. D Thermalquelle im Limmatknie, wo zum grosse Teil bim hütige Kurplatz us em Bode sprudled, sind sit dere Zit gnutzt worde. Mit öppe 47° Celsius chunnt es us em Bode und isch «un cadeau du ciel», es Gschänk vom Himmel, wi de Architekt vom noie Thermalbad, de Mario Botta emol gsaid het.
Nachdem s alti Thermalbad z Bade im Sommer 2012 gschlosse worde isch, het d Bädertradition en Unterbruch erlebt. Us de guet drü Johr, wo me damals für de Bau vom «Botta-Bad» erwartet het, sind meh wi nün Johr worde. Aber jetzt isch es so wit. Am Samschtig isch im Fortyseven en Tag vo de offnige Tür, wo me sich no für Füehrige cha aamelde. Vorgängig isch hüt, am Donnschtig, 18. November 2021, en Medieaalass gsi, zu dem de Mario Botta uf Bade cho isch. Au de Landamme Stephan Attiger und de Bademer Stadtamme Markus Schneider, sind bi dem Aalass debi gsi. Morn, Fritig isch dann en Aalass für gladeni Gäscht und am Samstig ebe de Tag vo de offnige Türe.
Am Sunntig started dann de Betrieb vom noie Thermalbad, wo vieles z büte het. Es het verschideni Becke mit unterschidliche Wassertemperature. Es git e Textilsauna und klassischi Nacktsaune, gmischt und für Frau und als Highlight e Panoramasauna mit Blick uf de Rebberg vo Ännetbade. Au Freibecki gits und de «Kosmos», en bsundere Ort zum entspanne.