D Stadtpolizei Züri suecht nacheme spektakuläre Unfall Züüge. Am Fritagmittag, 5. November 2021 isch en PW bi de Münsterbrugg i de Limmet glandet.
Es isch geschter öppe um Halbiseis am Mittag gsi, wo bi de Iisatzzentral vo de Stadtpolizei Züri e Meldig iigange isch, dass bi de Münschterbrugg en PW i de Limmet sig, schriibd d Stadtpolizei inere Mitteilig. Passante sind scho am Berge vonere Person gsi, wo d Polizei mit mehrere Patrouille aacho isch. De Lenker vom Fahrzüüg het vor Ort vo de Sanität und en Notarzt vo Schutz & Rettig Züri reanimiert und in kritischem Zuestand hospitalisiert werde müesse. De Maa, wo ellei im Auto gsi isch, isch schints uf em Stadthausquai in Richtig Münsterbrugg unterwägs gsi und dete über de Bruggechopf usegfahre, hets Gländer durchbroche und isch i de Limmet glanded. D Sanität het sich i de Folg ned numme um de Maa, sondern au um d Ersthelfer kümmered.
D Ursach vom Unfall und de genaue Hergang vom Unfall sind no ned klar. D Polizei suecht Persone, wo Aagabe zum Unfall bi de Münsterbrugg chönnd mache. Si selled sich bi de Stadtpolizei melde (Tel 044 411 717).