D Regionale 2025 wo en Limmattal e gmeinsami Identität wot geh, hat Halbziit gfiired. Bi dere Glägeheit isch au di bisherig Präsidenti verabschieded worde.

D «Regionale 2025 PROJEKTSCHAU LIMMATTAL» wot Mönsche bi de Umsetzig vo ihrne Idee unterstütze, wo Begegnigsort wend schaffe, noii Wohnforme entwickle und de Nahvercher noi denked. De Start isch im 2015 gsi mit de Vertragsunterzeichnig im Rothuus z Wettige. 16 Gmeinde im Aargauer und Zürcher Limmattal hend vilicht zum erschte Mol über d Kantonsgränze ewäg zammegspannt. D Halbziit wär im 2020 gsi, aber wi d Olympische Spil und d Fuessball-EM, het di erscht im 2021 chönne stattfinde. Und so hend sich Verträter vo de beteiligde Gmeinde, aber au Gross- bzw. Kantonsröt und witeri gladeni Gäscht am Ufer vo de Limmig z Noiehof iigfunde, zum Fiire.
En bsundere Punkt isch d Verbschidig vo de Brigitta Johner gsi, wo bi de Gründig s Präsidium übernoh het und scho damals ihr Rücktritt in de Mitti vom Projäkt aakünd het. Als bsundrigi Überraschig für si, sind zwöi Pontonier mitere Handorgelspileri vom Kanton Züri bis uf Noiehof cho, zum d Brigitta Johner go überrasche.