Im Limmattal wachsed gueti Wy, wie d Uswahl vom Staatswy jewils zeiged. I dem Johr isch de bescht Pinot Noir us Würelos und di noi Nachhaltigkeitsuszeichnig «Innovino Argovia» goht uf Ännetbade.
Für d Aargauer Winzer isch es jewils en bsunderige Tag, de Tag an dem de Staatswy kürt wird. Am 11. Juni 2021 isch zum 16. Mol so wit gsi. D Siger und dodemit d Träger vom Titel «Aargauer Staatswy 2021» usgwählt und bekannt geh worde. Wi immer gits vier Kategorie: RieslingxSilvaner, Wyssi Spazialitäten, Pinot Noir und Roti Spezialitäte. I dem Johr isch zudem s erschti Mol d en Uszeichnig für Nachhaltigkeit vergeh worde, «Innovino Argovia». Wi scho im letschte Johr, het wege Corona d Kürig ohni Publikum stattgfunde und au d Abendgala isch usgfalle. Dodefür sind wider drü Büs unterwägs gsi und hend d Diplom und d Priise verteilt.
«Aargauer Staatswy 2021» sind de RieslingxSilvaner vom Wyguet Lindenmann z Seenge, de Pinot Gris Breschtebärg vo Wehrli Wybau z Chüttige, de Pinot Noir Classique vom Wyguet Wetzel z Würelos und de Wiler Barrique Pinot Noir vo de Wiler Trotte, Wybaugnosseschaft z Wil.
De Nachhaltigkeitspriis «Innovino Argovia» het de Christian Wetzel vom Wyguet Jürg Wetzel us Ännetbade gwonne. Sis Projäkt «Chêne Wetzel’ Barriques aus eigener Hand » hetti in ökologische, ökonomische und soziale Ebeni usegstoche, schriibd de Kanton inere Mediemitteilig. Für eigedi Barriques setzt s Wyguet Jürg Wetzel uf Eicheholz us de Region Bade und küfert d Fässer als eigeds Familieprojekt unter Aaleitung vom familieeigede Küfer, em Stephan Wetzel.