Am Tsischtig, 4. Mai 2021 het es churz vor de Halbidrü am Morge z Nussbaume chlöpfd, wi Aawohner de Notruefzentrale gmelded hend. Glichzitig isch en Alarm vo de Filiale vo de Aargauische Kantonalbank (AKB) a de Schuelstross iigange.
Nach em Iigang vom Alarm hend sich mehreri Patrouille vo de Kantonspolizei (Kapo) und de Stadtpolizei Bade (StaPo) uf de Wäg nach Nussbaume gmachd. Vor Ort hend si e grossi Verwüestig chönne feschtstelle. De Bankomat vo de AKB isch gschprengt worde.
D Täterschaft het mitere no unbekannte Mengi Bargäld chönnd flüchte, schriibd d Kapo inere Mediemitteilig. Fluchtfahrzüüg sig muetmasslich en Roller gsi, heissts do witer. D Fahndig, wo sofort iigleitet worde isch, het bisher kein Erfolg gha.
D Kapo bitted um Hiwiis us de Bevölkerig. Persone wo Aagabe zu de Täterschaft oder de Flucht chönnd mache, sind bete, sich bi de Kapo z mälde (Tel. 056 200 11 11). Witer vo Interesse siged privati Videoüberwachige, wo zum Tatziitpunkt Ufnahme gmachd hend.