Sit einige Mönet taged de Grossi Rot in de Umwältarena z Spreitebach. Aber au d Synode, also s Chileparlament, vo de Reformierte Chile Aargau, het de Sitzigsort vo Aarau ins Limmattal verleged.

Am Mittwoch, 18. November 2020 het sich di reformiert Synodale scho zum zwöite Mol im Trafo z Bade versammled. Wi bim Grosse Rot, isch de Tagisoret so gwählt worde, dass d Abständ chönd iighalte werde. D Versammlig isch mit Maskepflicht au bi de Vote duregführt worde und de Snyodepräsident Lucien Baumgaertner het grad am Aafang de Aatrag gstellt, uf en Teil vo de Traktande z verzichte, um am Mittag chönne z höre. D Traktande sind glichwohl (g)wichtig gsi. S Budget 2021 isch ohni Gegestimm verabschiedet worde und de Finanzplan 2021-2024, wo mit dütliche Rückgäng uf de Iinahmesite rächned, isch zur Kenntnis gnoh worde.
Di mit Spannig erwarteti Ersatzwahl für de Chilerot Martin Keller vo Buchs, isch dann gar ned so spannend gsi. Scho im erschte Wahlgang het sich de Pfarrer Christian Bieri vo Underämpfäud mit 65 Stimme bieme absolute Mehr vo 61 gege vier witeri Bewerber duregsetzt. Numme d Pfarreri Christina Soland us Niederlänz, wo erscht e paar Täg vor de Synodesitzig ihri Kandidatur erchlärt het, isch mit 37 Stimme e chli öppis wi e ernschthafti Gegekandidatin gsi. Di andere drü Bewerber, de Pfr. Michael Rahn us Muri, de Pfr. Raffael Sommerhalder us Gräniche und Pfr. Susanne Ziegler vo Länzbrg hend jewils weniger wi 10 Stimme übecho.