Am Sunntig, 12. Januar 2020 het d Kantonspolizei es Fahrzüüg uf de A1 blitzt. Es isch mit 211 km/h unterwägs gsi.

Wi d Kantonspolizei Aargau inere Mediemitteilig schriibd, isch en 23-jährige Kroat mit sim Audi uf de Autobahn A1 Richtig Züri gfahre. Wobi gfahre wohl s falschi Verb isch, er isch nämli grast. Wegere Gschwindigkeitskontrolle, wo d Kapo uf dem Streckeabschnitt duregfüehrt het, isch er blitzt worde. Di erlaubti Höchschtgschwindigkeit vo 120 km/h het er um 91 km/h überschritte.

D Staatsawaltschaft Bade het e Strofuntersuechig nach Artikel 90 Absatz 3 vom Strosseverchersgsetz eröffned, em sog. ‘Raserartikel’. S Fahrzüüg isch beschlagnahmt worde und em Fahrer het d Polizei de Fahruswiis abgnoh. Ihm droht e Gfängnisstrof.