Hüt, 27. Dezember 2019 am Mittag isch d Meldefrischt für d Ersatzwahl vo zwöi Lüt i de Gmeindrot Noiehof abgloffe. Sibe Manner hend ihri Kandidatur aagmeld.

De Doppelrücktritt vo de Susanne Voser und em Andreas Muff us em Gmeindrot Noiehof mached en Ersatzwahl vo zwei Gmeindröt und em Gmeindamme notwendig. Für d Ersatzwahl vo zwöi Gmeindröt, wo am 9. Februar 2020 wird stattfinde, sind bi de Gmeind Noiehof siebe Aameldige iigange. De Jürg Amrein, de Igor Arsenijevic, de Christopher Benz, de Daniel Burger (alli parteilos), de Christoph Güdel (Grüeni), de Martin Uebelhart (CVP) und de Tim Voser (FDP) wend en Gmeindrotssitz erobere.

Für d Wahl zum Gmeindamme kandidiird numme de Martin Uebelhart. Um Gmeindamme z werde, muess er aber au als Gmeindrot gwählt werde.

Im erschte Wahlgang sowohl bim Gmeindrot, wi bim Gmeindamme sind aber ned numme di offizielle Kandidate wählbar, sondern alli Noiehofer Stimmberechtigte. Wenn en zwöite Wahlgang nötig wird, wird er am Sonntig, 29. März 2020 stattfinde.