De Zivilschutz Wettige-Limmattal het Lüt us de Politik und vo Partnerorganisatione empfange. Letschte Fritig isch de jährlich Behördetag gsi.
Ranghohi Verträter vo Gmeinde, Militär, Zivilschutz und Füürwehrhend am Fritig d Köpf zämegstreckt, schriibd de Zivilschutz inere Mediemitteilig. De Behördetag, wo de Zivilschutzkommandant is Läbe grüefd het, wot einisch im Johr d Mitglider vo Behörde un Partnerorganisation über gleischteti, laufendi und künftigi Projäkt informiire und d Kooperatione analysiire.
«De Schwelbrand im tüüfe Wald vo de Lägere vom letschte Sommer het zeiged, dass oisers Bereitschaftselement funktioniird», so de Rickenbacher. Innert kürzeschter Ziit siged di bruefstätige Zivilschützer vor Ort gsi. Au d Zammenarbet mit de Füürwehr heeti tadellos chlapped, so de Kommandant vo de ZSO Wettige-Limmatal witer.
Sorg bereited d Revision vom nationale Zivilschutzgsetz, het me bim Aalass chönne verneh. Intensiv isch drüber diskutiird worde, wi vil Manner und Fraue es im Zivilschutz, bim Zivildienscht und bi de Armee bruuchd.
De Wettiger Gmeindammee Roland Kuster het bim Aalass betond, dass er de Behördetag sehr würd schätze. «In Krisene Köpf kenne» sig wichtig, um es gmeinsams Funktioniire vo de Organisatione sicherzstelle.

Advertisements