In de Nacht vo geschter uf hüt isch en Maa vo eim oder mehrer Uubekannte nidegschtoche worde. Er isch hut, Sunntig, 5. Mai 2019 am frühe Morge im Spital schtorbe. Nach de Täter laufd e Fahndig und d Kantonspolizei (Kapo) suecht Züüge.
D Kapo schriibd inere Mediemitteilig, dass de Notruef hüt am Morge gege Viirtelabdrü iigange sig und d Patrouille, wo usgrückt isch, a de Zelgmattstross z Killwange en schwer verletzte Maa aatroffe het. De 57-jährig Montenegriner het mehreri Stich- und Schnittverletzige gha und isch mit de Ambulanz ins Spital brochd worde. Dete isch er gschtorbe.
D Polizei fahnded nach de unbekannte Täterschaft, wo vor em Iiträffe vo de Iisatzchräft unerkannt hend chönne flüchte. D Staatsaawaltschaft Bade het en Strofuntersuechig eröffned und d Kapo ermittled. Schints isch s Opfer vor em Mehrfamiliehuus a de Zelgmattstross aagriffe worde. Wer Aagabe über verdächtgi Beobachtige cha mache, sell sich bim Polizeikommando vom Kanton Aargau mälde (Tel. 062 835 81 81).

Advertisements