De Verenahof, de Bäre und de Ochse hend e Rehaklink selle werde. D Plän liged sit em Sommer 2023 uf Iis und es stellt sich d Frog, wie es chönnd witergoh.
Im Mai 2022 hend au mir no denkd, dass s Verenahofgeviert e Perle chönnd werde. Wo mir im Mai 2023 no einisch sind dine gsi, het sich wenig veränderet gha, obwohl de Bsitzer, d Gsundheitsstiftig Bad Zurzach + Bade in de Zwüscheziit Millione investiert het. Im Sommer 2023 het d Stiftig das Projekt gstoppt, sither wird am Verenahofgviert nümm gschaffed und was mit em Gebäud sell werde, isch völlig unklar. Es wär au en Herkulesufgab, isch doch ein Teil vo de Gebäud unter Schutz, anderi Teil ned. S het kei vollständigi Plän und d Statik isch unklar.
Wie s Regionaljournal Aargau/Soledurn melded, chönnts jetzt aber e rettendi Idee geh. De Bademer Investor Christoph Schoop het en Idee, was me mit dem Vernahof, em Bäre und em Ochse chönnd mache. Er sig parat als Co-Investor iizstiige, het er im Stefan Ulrich vom Regionaljournal gsaid. Er het sini Idee de Gsundheitsstiftig unterbeited, sit em März 2025, also sit fascht eme Johr nüd meh vo de Stiftig vernoh. Mit bliibed am Thema draa und melded ois, we mir meh wüssed.

Do finded ihr oises Video vom Mai 2022: