Z Bade isch es zueme Unfall cho, wo zwöi Minderjährigi d Kontrolle über «ihre» PW verlore hend. Si sind gege es parkierts Fahrzüüg gfahre und dann gflüchtet.
D Kantonspolizei nennts in de Mediemitteilig e «Strolchefahrt», was zwöi 14-jährigi Jugendlichi am Sunntig, 8. Dezember am Morge um die Halbiachti umme gmacht hend: Si hend vom Vater vo eim vo dene beide en BMW gnoh und sind dann ineme Wohnquartier z Bade gege es parkierts Auto gfahre. Ohni sich um de Schade z kümmere sind si devo, aber vonere Augezüügin gseh worde. Di het sofort de Polizei aaglütet und Patrouille het vor Ort s Kontrollschild vom BMW gfunde, wo bim Zämmeprall abgheit isch. Am Wohnort vom Fahrzüüghalter het d Polizei dann de starch beschädigt BMW gfunde und zwöi Jugendlichi gshe devospringe. Nach ere churze Verfolgig z Fuess sind di beide gfasst worde. De muetmasslich Lenker isch alkoholisiert gsi und es het de Verdacht uf Drogeiifluss bestande, so dass er e Bluet- und Urinprob het müesse abgeh. Beidi müent sich jetzt vor de Jugendstaatsaawaltschaft verantworte.