Wenn e Chilepfläg nüm in de Lag isch, ihri Ufgabe z erfülle, setzt de Chilerot vo de Landeschile en Kurator ii. Bi de reformierte Chilegmeind Spreitebach-Killwange isch das per 16. September 2024 passiert.

D Chilegmeind Spreitebach-Killwange stoht vor aaspruchsvolle Noiusrichtige und Strukturprozess, schribt die Reformiert Landeschile Aargau innere Mediemitteilig. D Umsetzig vo de Immobiliestrategie und Abklärige über en allfälligi Fusion mit de Chilegmeind Wettige-Noiehof bruuched Ufmerksamkeit.Zudem het de Pfarrer Stefan Siegrist sin Rücktritt per ÄndI April 2025 iigreicht: De absehbari Personalmangel und Durchfüehrig vonere Noibsetzig vo de Pfarrstell bruuched ebefalls zitlichi Kapazitäte. D Chilepfläg, in dere d Sitz vo drü Ehreamtliche vakant sind, mag das ned stemme. Us dem Grund het d Chilepfläg in Absproch mit de Gmeindberotig vo de Kantonalchile um d Iirichtig vomene Kuratorium bäte.

De Chilerot het an sinere Sitzig vom 5. September de Bitt entsproche und de Martin Bihr zum Kurator gwählt. Er isch en erfahrene Organisationsberater und het dodemit s nötig Know-How, en effizienti Arbeitswiis und es strukturierts Vorgehe, zum d Chilegmeind professionell durch die aastehende Strukturprozess z führe.

Am 16. September sind d Amtsgschäft vo de Chilepfläg an de Kurator übergeh worde. Die vier ehreamtliche Chilepflägsmitglieder, bi denen s Amt während em Kuratorium duet ruhe, sind dodemit vo de Füehrig vo de Amtsgschäft entlastet und chönnd de Kurator inhaltlich unterstütze. S Ziel isch d Sicherstellig vonere optimale Witerführig vo de Strukturprozesse.