Schon bald nach de verheerende Explosion z Nussbaume het Polizei vo «potentem Füürwerk» als Ursach gred. Jetzt het d Oberstaatsaawaltschaft über die erste konkrete Ermittligsergäbnis informiert.

Am Donnschtig, 13. Juni 2024 isch es churz vor de Sibni am Abe, wie scho brichted, inere Tüüfgarage in de Nöchi vom Markthof, zuere grosse Explosion cho. Nach em aktuelle Stand vo de Ermittlige, isch d Explosion vomene Ruum in de Tüüfgarage usgange, in dem sich die beide spötere Opfer ufghalte hend. In dem Ruum grossi Mengene vo illegalm us um Usland importierts Füürwerk glagered gha, so d Oberstaatsaawaltschaft. Die Art vo Pyrotechnik muess korrekt glagered werde, es bruuchd für de Import und d Handhabig e Bewilligung und zudem spezielli Fachkenntnis. All das isch nach em aktuelle Stand vo de Ermittlige, ned de Fall gsi.
Schints hend di beide Manne an dem Abe versuecht eigedi Füürwerkskörper herzstelle, was zunere unbeabsichtige Entzündig gfüehrt het. Innere Kettereaktion het sich dann vermuetlich e grossi Aazahl Pyrotechnik entzündet, was zunere Gasentwicklig gfüehrt het, wo sich im gschlossene Ruum ned witer het chönne usbreite. De Druck het sich dann in
«Richtig vo de Ruumwänd und entlang vo de grossflächige Decki vo de Tüüfgarage» entlade, wie d Oberstaatsaawaltschaft schriibt. De so entstandene Füürball, d Hitzeentwicklig und möglicherwiis Rescht vom Füürwerk, hend dann zu Bränd gfüehrt, wo en grosse Sachschade aagrichted hend.
Es git kei Hiwiis uf es Sprengstoffdelikt, en terroristische Hintergrund oder es vorsätzlichs Verhalte. Di bisheirge Uswertige vo de Spure zeiged «numme» en falsche Umgang und Lagerig und es unbeabsichtigts Fehlverhalte mit de gfährliche Stoff, wo zu dem verhängnisvolle Unfall gfüehrt hend.

Lüt, wo wege de Explosion und ihre Folge Sachschäde erlite hend und die bis jetzt weder de Verwaltig, de Versicherig oder de Polizei gmeldet hend, selled sich zitnöch via E-Mail-Adresse (info(at)kapo.ag.ch) bi de Kantonspolizei Aargau melde.