Am Donnschtig, 13. Juni 2024 am Abe kurz vor de Sibni isch es bim Markthof z Nussbaume zunere Explosion cho. Zwöi Manner sind dodebi gstorbe.
D Erschütterig und d Rauchwolke sind gross gsi, wo es am Donnschtig am Abe z Nussbaume zunere Explosion cho isch. Schnell sind aber d Iisatzchräft vo Ort gsi, au wil diversi Brandmeldeaalage losgange sind, wie de Kommandant vo de Füürwehr Obersiggetal, de Lorenz Füglister im Interview mit em Badener Tagblatt gsaid het. Er isch einer vo de erschte vor Ort gsi, wo er sehr chaotischi Verhältnis aatroffe het. Betroffeni, Schaulustigi und Bewohner siged da gsi und es het witeri Explosione geh.
Nussbaume isch dann verkehrstechnisch abgrigled worde. Numme no Iiwohner und d Rettigschräft hend in de Ort dörfe. Meh wie 200 Füürwehrlüüt hets vor Ort gha, wobi d Füürwehr Obersiggetal vo Gäbischtorf, Bade und Spreitebach Unterstützig becho het. Au drü Helikopter, elf Ambulanze, de Zivilschutz und s Kantonale Katastropheiisatzelement (KKE) sind im Iisatz gsi. Wil de Brand in de Tüüfgarage usbroche isch und bi de Füürwehre d Katastrophe vo Gretzebach im 2004 ned vergässe isch, isch d Garage vo use glöscht worde.
Bi de Explosion sind zwöi Manner, en 24-jährige Schwiizer und en 43-jährige Italiener ums Läbe cho. Elf Mönsche sind verletzt worde, aber numme liicht. D Ursach vo de Explosion isch no ned sicher, d Kantonspolizei het aber mitteild, dass es «potents Füürwerk» in Frag chämti, «meh wie e normali Füürwerksbatterie, wo im Handel cha erworbe werde».